1 Samuel 4
1 該時，以色列人出去愛㧯非利士人相㓾。以色列人在以便以謝安營；非利士人在亞弗安營。
2 非利士人擺陣攻擊以色列人，打到非常激烈，最後打贏佢等，㓾掉差毋多四千以色列人。
3 士兵轉到營肚个時，以色列該兜長老講：「今晡日上主做麼介俾非利士人打贏𠊎等呢？𠊎等遽遽到示羅去，將上主个約櫃扛出來！恁樣，佢就會㧯𠊎等共下去，將𠊎等對敵人个手中救出來。」
4 所以，佢等派人到示羅去，將坐在兩個基路伯中間个上主—萬軍元帥个約櫃扛出來。以利个兩個孻仔何弗尼㧯非尼哈跈上帝个約櫃共下來。
5 上主个約櫃到軍營个時，以色列人就大聲歡呼，連地泥都會顫。
6 非利士人聽到歡呼个聲，就講：「希伯來營肚做麼介喊到恁大聲！係麼介意思呢？」當佢等發現該係上主个約櫃到希伯來營中，
7 就全部著驚，講：「有神明到佢等个營肚來了！𠊎等慘了！𠊎等從來毋識堵到這種事！
8 𠊎等慘了！麼人能救𠊎等離開該兜大能个神明呢？在曠野用各種災禍㓾死埃及人个，就係該兜神明啊！
9 非利士人啊，愛勇敢！愛做大丈夫出去相㓾！若無，𠊎等就會做希伯來人个奴才，像佢等以前做𠊎等个奴才共樣。所以，𠊎等愛做大丈夫勇敢去相㓾！」
10 非利士人拚命相㓾。以色列人又輸掉，逐儕走轉自家个屋下。這擺死掉个人非常多，以色列有三萬軍人被人㓾死。
11 上帝个約櫃被人搶走；以利个兩個孻仔何弗尼㧯非尼哈也被人㓾死。
12 該日，有一個便雅憫支族个人對戰場一直走到示羅。佢扯爛衫，委灰在頭那頂，表示悲傷。
13 以利心肝肚非常擔心上帝个約櫃，坐在路堘緊看。該人在城肚將消息傳開，逐儕全部著驚大噭。
14 以利聽到大噭个聲，就問：「做麼介有這個大聲？」該人也走到以利頭前報告消息。
15 (當時以利已經九十八歲，差毋多完全看毋到。)
16 該人對以利講：「今晡日𠊎對戰場一直逃到這位。」以利問佢：「吾孻仔啊，發生麼介事情？」
17 該人講：「以色列人對非利士人面前逃走；𠊎等个軍隊輸到當慘；另外，你兩個孻仔何弗尼㧯非尼哈也被人㓾死。上帝个約櫃乜被人搶走了！」
18 該人講到上帝約櫃个時，以利就對城門堘、佢个座位頂向後背橫落去。以利盡老又大箍，一橫落去就跌斷頸筋死掉。佢做以色列个士師總共四十年。
19 以利个心舅，非尼哈个𡜵娘，堵好有身項，產期會到。姖聽講上帝个約櫃被人搶走，厥家官㧯老公也死掉，姖个肚笥就痛到無葛無煞，𫱔出細人仔。
20 姖斷氣以前，在塍頭照顧姖个婦人家對姖講：「毋使驚！你𫱔到一個孻仔囉！」總係姖毋搭人，也毋出聲。
21 姖㧯細人仔安到以迦博，又解釋講：「上帝个榮光離開以色列了」，意思係指上帝个約櫃被人搶走，厥家官㧯老公也死掉。
22 姖講：「上帝个榮光已經離開以色列，因為上帝个約櫃被人搶走了。」